قدر الرحيل
وانا بين غناوى الشوق وحلم المستحيل
سالت دموع عينى فى مشهد جليل
علمنى كيف اصبر على جرح الفراق فى كل ليل
وقفن حمامتين بين ايدى ازكن اجيج الشوق على قلبى العليل
عاشقين رهاف واقفين على الاطلال ضحى ويتباكوا لى وقت الاصيل
كان عهدى بيهم كل صباح يشجونى بى نغم الهديل
وفى لحظة انقطع الوصال بيناتنا والعهد الجميل
لامونى بى حرقة واسى وصفونى بالظلم الدخيل
قالوا لى : ليه تحرم صغارنا من الحنان وتهدم العش الظليل؟؟
درب الخراب تسعالو ليه ما ليك حق فى ده السبيل؟؟
ان كنت هدمت العشيش شان تبنى ليك قصراً مهيل
اتذكر انو الدنيا ما دار القرار..... تدى ......وتشيل
وان كنت اخترت الفراق ...... العشرة ما بتهون قليل
ولملم جديدك واسكنو ما بنرضى بالاول بديل
وجنحينا لو هى مقصصات ... فى قلوبنا حب سامى ونبيل
كان ردى ليهم فى التياع ... والدنيا بى ضاقت عديل
كفى ياحمامات النواح ... كفى من صراخك والعويل
درب الخراب ما اخترتو ليك ومابرضى لو عشك يميل
ونار الفراق جواى سنين ... ساقيانى من كاساتها ويل
ومالى جناحين ياحمام ... وزيك كمان فاقد الدليل
وما مثلك انت تنوم عشى سهران مع الليل الطويل
اضمد جراح زمن الاسى .. ودموعى فى الخدين تسيل
وانزل على دروب الحياة ... من الدغيش البدرى لى بعد المقيل
تقدر تقول لى ياحمام سبب الحزن فى دنيا كلها ويل فى ويل
غير الصبر والابتسام ...... .. للجاية .........والكانت قبيل
وانا وانت بالمقياس سواء..... مين فينا ميزانو بيميل..؟؟؟؟
قال لى معاناتك كتييييييرة بلا حدود ... بس قيسها بى قدر الرحيل
مع حبى
